ضلع ہری پور میں امن و امان کو یقینی بنانے اور شرپسند عناصر کے خلاف بھرپور کریک ڈاؤن کے سلسلے میں سی ٹی ڈی کی جانب سے ہری پور شہر اور حطار کی حدود میں مختلف مقامات پر ایک وسیع سرچ اینڈ اسٹرائیک آپریشن کیا گیا ۔
ہری پور( مہر سیماب) ڈی پی او ہری پور فرحان خان کے احکامات پر ایس پی محکمہ انسداد دہشتگردی ثمینہ ظفر اور انکی ٹیم بشمول لیڈیز اہلکاروں نے سرچ اینڈسٹرائیک آپریشن میں حصہ لیا ۔
ایس پی سی ٹی ڈی ثمینہ ظفر کا کہنا تھا کہ امن و امان کی بحالی اور عوام کے تحفظ کے لیے تمام دستیاب وسائل بروئے کار لائے جا رہے ہیں، جبکہ شرپسند عناصر کے خلاف مختلف پالیسی پر سختی سے عمل کیا جا رہا ہے ۔
انہوں نے مزید کہا کہ ہری پور کی مقامی آبادی کے جان و مال کا تحفظ ہماری اولین ترجیح ہے اور کسی بھی مشکوک سرگرمی یا قانون شکنی کو ہرگز برداشت نہیں کیا جائے گا ۔
یہ سرچ آپریشن ڈپٹی انسپکٹر جنرل آف پولیس ہزارہ ناصر محمود ستی اور ڈی پی او ہریپور فرحان خان کے خصوصی احکامات پر کیا گیا، جس کا مقصد علاقے میں امن و امان کی فضا کو مزید مستحکم بنانا اور عوامی اعتماد کو بڑھانا ہے ۔
آپریشن کے دوران اہم مقامات،رہائشی آبادیوں، ہوٹلز، گیسٹ ہاؤسز اور راستوں کی تفصیلی تلاشی لی گئی، جب کہ مشکوک افراد کی تصدیق اور ریکارڈ چیکنگ بھی کی گئی ۔
