راولپنڈی: مال روڈ راولپنڈی کو نئے انڈر پاس منصوبے پر تعمیراتی کام کی وجہ سے آج (بروز جمعہ) ہر طرح کی ٹریفک کے لئے بند کر دیا جائے گا۔
سٹی ٹریفک پولیس راولپنڈی کی طرف سے اضافی نفری تعینات کی جائے گی ایم ایچ چوک سے ٹی ایم چوک تک قلیل عرصے کے لئے مکمل طور پر بند کر کے ٹریفک کو متبادل راستوں پر ڈائیورٹ کیا جائیگا جس کے لئے ڈائیورشن پلان جاری کر دیا گیا ہے جو آج رات سے نافذالعمل ہو گا۔
ایم ایچ چوک سے ٹی ایم چوک کی طرف جانے والی ٹریفک کو مال روڈ کے متوازی حیدر روڈ پر منتقل کیا جائے گا جہاں سے ٹریفک مریڑ چوک، مری روڈ اور راشد منہاس روڈ کا استعمال کرتے ہوئے کچہری چوک کی جانب باآسانی جا سکے گی جبکہ گولڑہ موڑ سے 22 نمبر، کلمہ چوک اور ملحقہ علاقوں کی طرف جانے والے شہری قاسم مارکیٹ سے کنوائے روڈ سے ہارڈنگ روڈ سے این ایل سی چوک سے 22 نمبر اور دیگر علاقوں کی طرف جا سکیں گے۔
چیف ٹریفک افسر راولپنڈی بینش فاطمہ کے مطابق متبادل روٹس حیدر روڈ اور مری روڈ پر جنگ بلڈنگ یو ٹرن تک کسی قسم کی پارکنگ کی اجازت نہیں ہوگی انڈر پاس کی تعمیر کے دوران متبادل راستوں پر اضافی نفری بھی تعینات کر دی گئی ہے تاکہ ٹریفک کی روانی برقرار رہے اور شہریوں کو کسی قسم کی مشکلات کا سامنا نہ کرنا پڑے انہوں نے کہا کہ اس انڈر پاس کی تعمیر کے دوران سینئیر ٹریفک افسر راولپنڈی، ڈی ایس پی ٹریفک وی وی آئی پی اور ڈی ایس پی ٹریفک ہیڈ کوارٹرز متبادل راستوں پر ٹریفک کی روانی کو یقینی بنانے کے ذمہ دار ھوں گے انہوں نے شہریوں سے اپیل کی کہ وہ ٹریفک پولیس کی جانب سے جاری کردہ ہدایات پر عمل کریں اور کسی بھی قسم کی پریشانی یا دشواری کی صورت میں سٹی ٹریفک پولیس راولپنڈی کے سوشل میڈیا پیجز (@ctrwp) کو فالو کریں یا ہیلپ لائن نمبر 051-9274843 پر رابطہ کریں شہری دوران تعمیر متبادل راستوں کا استعمال کریں، ٹریفک قوانین کی پابندی کریں، اور کسی بھی ہنگامی صورت حال میں سٹی ٹریفک پولیس سے فوری رابطہ کریں۔
