اٹک کے مختلف علاقوں میں مختلف واقعات میں دو افراد جاں بحق ہوگئے۔ پولیس نے ایف آئی آر درج کر لی ہے اور تحقیقات کر رہی ہے۔
پہلی واردات میں تھانہ بسال کی حدود میں ایک بزرگ کی کنویں سے نعش برآمد ہوئی۔ ریسکیو 1122 کے اہلکاروں نے اس کی نعش کنویں سے نکال لی۔ ایک اور واقعہ میں نیو ایئرپورٹ تھانہ فتح جنگ کی حدود میں ایک ٹیکسی ڈرائیور کی لاش پڑی ہوئی ملی۔ٹیکسی ڈرائیور حنیف گاؤں قطبل کا رہائشی تھا۔ ایس ایچ او نیو ایئرپورٹ تھانہ طاہر اقبال نے صحافی کو بتایا کہ قاتلوں کی گرفتاری کے لیے ٹیمیں تشکیل دے دی گئی ہیں۔ ٹیکسی ڈرائیور گزشتہ دو دنوں سے اپنے گھر سے لاپتہ تھا۔
ایف آئی آر کے مطابق وہ اپنی اہلیہ کو یہ کہہ کر گھر سے نکلا کہ وہ کچھ مسافروں کو اتارنے اٹک جا رہا ہے لیکن واپس نہیں آیا اور اس کا موبائل فون بھی بند پایا گیا۔ بعد ازاں ان کی لاش برآمد ہوئی لیکن ان کی ذاتی کار جسے وہ ٹیکسی کے طور پر استعمال کر رہا تھا غائب تھی۔
